Jæja þá er þessi vinnuvika senn á enda. Ég hef farið 100% eftir DDV þessa viku og finn heilmikinn mun á mér. Í kvöld ætla ég að grilla nautakjöt og bera fram með því fjölbreytt úrval grænmetis og svo ætla ég að gera tzaziki-sósu með því mmmm. Helgin er lítið plönuð nema Herdís vinkona var að hvetja mig til að heimsækja sig á morgun og það getur vel verið að ég leggi land undir fót og bregði mér til höfuðborgarinnar. Mánudagurinn verður strembinn en ég þarf að fara suður og taka flug austur á Egilsstaði á fund, síðan mun ég koma aftur í bæinn um kvöldið og verð að öllum líkindum ekki komin heim í rúmið mitt fyrr en um miðnætti. OG síðan á þriðjudagskvöldið verður langþráð vigtun, hlakka svo til......þarf virkilega að standa mig í mataræðinu þangað til...tek með mér fullt af gulrótum og ávöxtum á fundinn  
Góða helgi!

Hæ, hó! Er aðeins að laumast hérna í vinnunni. Það var enginn fundur í Borgarnesi í gær þannig að engar nýjar tölur hér á bæ, því miður. Af því að enginn fundur var þá hittumst við þrjár, ég, Þórhildur og Þórunn H heima hjá mér. Ég hafði búið til súkkulaðibúðing (Oetker) og með honum voru hindber og sýrður rjómi.....mikið rosalega var þetta gott, jammíjammí! Annars gerist lítið hjá mér er að fara upp í sveit núna á eftir að líta á skóga, veðrið er æði og ég er æði og í banastuði...heheheh. Skrifa meira síðar

Þessi helgi var nú ansi róleg hjá mér. Ég gekk reyndar stóra hringinn á laugardaginn með Sirrý það var hressandi og veðrið   það var algjör draumur. Síðan stússaði ég aðeins í garðinum, uppskar kartöflurnar, púrrulaukinn og klippti steinseljuna. Annars gerðist víst lítið fyrir utan að það var brjálað að gera í eldhúsinu. Á föstudaginn var Stefán búinn að panta að það yrðu eldaðir hammarar, ég gerði það með glöðu geði, bjó til buff og steikti. Þeir sem vildu gátu haft hammarana hefðbunda með sósu og brauði en ég gerði hvítlaukssósu fyrir mig, mikið rosalega var það gott og sleppti brauðinu. Með þessu var slatti af fersku grænmeti og síðan bjó ég til hinar margrómuðu rófufranskar mmmmmm mikið rosalega eru þær góðar!!  Eldaði skötusel á laugardagskvöldið. Tók hann og velti upp úr mjólk og síðan hveiti sem var kryddað með karrý, tandoori, pipar og jurtasalti, steikti á pönnu. Síðan tók ég rosalega mikinn hvítlauk og setti á pönnu og blandaði svo rækjum út á, kryddaði þetta með karrý, hellti gromsinu yfir skötuselinn jammíjammí mikið hrikalega var þetta gott með haug af fersku og soðnu grænmeti  Svo í hádeginu í gær gerði ég groms sem Kristín var búin að benda okkur á á fundi um daginn, tók brauð og tætti það niður, 300 gr grænmeti (ég var með sveppi og papriku) skorið í spað hrærði svo einu eggi saman við 75 gr kotasælu og 1 dl fjörmjólk kryddaði með pipar og hellti yfir og inn í ofn.....rosagott, mæli með þessu nema ég ætla næst að hafa meira úrval af grænmeti og ég held það sé algjör nauðsyn að hafa lauk eða hvítlauk.
Núna sit ég heima með litla stubbinn minn, hann er lasinn, ekkert alvarlegt bara kvef, hósti og smá hiti. Úti er sól og blíða, það eru svona skilyrði að mér finnst allt vera skítugt....spurning um að draga bara fyrir gluggana svo sólin komist ekki inn!! Annars tek ég kannski fram tuskuna þegar drengurinn sofnar og ræðst á eldhúsið...ætlaði hvort eð er að gera hausthreingerningu einhverntíman, jólahreingerningin í fyrra varð bara kattarþvottur og var frestað til vorsins en í vor var svo gaman að vera í garðinum að vorhreingerningin varð líka bara kattarþvottur svo núna gengur þetta víst ekki lengur!!! Annars er haustið ekki nærri því búið laaangt í fyrsta vetrardag

Þá er hinn mikli feltvinnudagur búinn, byrjaði á því að fara með Þórunni P að gróðurgreina tilraunareiti á Hafnarmelum. Það gekk fínt, við komumst vel af stað og ætlum að taka tvo dagparta í næstu viku til að klára....er svo gaman að vinna úti í svona góðu veðri sól og blíða og meira að segja nær logn og það undir Hafnarfjalli!! Eftir hádegið fór ég síðan á einn bæ og skoðaði væntanlegt skógræktarsvæði. Á frekar von á að fara mikið út um allar koppagrundir í næstu viku að klára úttektir og annað.
Mataræðið gengur svona allt í lagi fyrir utan "staðfestasamvistirveisluna" þar var ýmislegt framandi í boði t.d. smjördeigsbaka með túnfiski, rúsínum, ólífum og kryddi, brauðterta með majo, blönduðu grænmeti og kjúlla, röndótt hlaupterta, marsipanterta með vanillukremi og ostar í úrvali. oooog ég smakkaði allar sortir!!! ooooooog svo drakk ég bjór hmhmhmhhm jamm ég veit aaaaarggggggg
Síðan á að taka helgina með trukki og malla eitthvað girnó, kannski baka ég eitthvað DDV vænt, hver veit
Að lokum, til hamingju með afmælið pabbi og Steinunn Hj.

Verð að laumast til að gefa smá skýrslu. Reikna ekki með að komast í að blogga fyrr en á morgun, er að fara í feltvinnu eftir hádegið og á morgun....ohh það er svo gaman í svona góðu veðri.
Fór á fund í Kleppjárnsreykjaskóla í gær en það var verið að kynna námsefni vetrarins hjá 5. bekk. Lýst vel á þetta þau eru ekki nema 9 í bekknum og kennarinn er indælis kona sem ætlar að leggja mikla áherslu á íslenskukennslu m.a. stafsetningu og ljóð. Það finnst mér frábært. Eftir fundinn brunaði ég í saumó og stóð mig svona lalala þar, fékk mér sprite zero og svo freistaðist ég í Doritos og salsa mmmm og enn sem fyrr ekkert sætt (nema það er örugglega sykur í sölsunni). Var frekar löt að prjóna en ég er að prjóna aðra lopapeysu á mig...hin er orðin svo slitin sem ég prjónaði í fyrra því ég er bara alltaf í lopapeysu...ohhh svo hlýtt og gott.
Það gerðist líka ýmislegt í vinnunni í gær, minn ágæti yfirmaður bauð mér og hinum starfsmanninum hjá verkefninu (Vesturlandsskógum) í veislu....jamm við fengum boðskort þar sem okkur var boðið ásamt mökum í veislu í kvöld (21.sep) til að samfagna honum og unnustanum í tilefni af því að þeir eru að fara að staðfesta samvist sína hjá sýsló!
Semsagt brjálað að gera hjá mér (og ég slugsa bara og blogga....)  já og síðan setti ég inn tvær "fyrimyndir" af mér...þær eru frekar lélegar en ég held að keppirnir og rassinn fari ekkert framhjá neinum!!
Nú styttist í hádegismat, er með 300 gr. salat, 50 gr af kjúlla, 25 gr.feta og 3 tsk olía með kryddi....mmmrosagott

Tala vikunnar er 0,9 kg  jej  Er mjög ánægð með það, sérstaklega í ljósi þess að helgin var ekki alveg 100%
Nú er eins gott að maður haldi rétt á spöðunum því næsta vigtun verður ekki fyrr en eftir 2 vikur þ.e. 3. okt. Við skutlurnar verðum bara að vera duglegar að peppa hvor aðra upp og styðja. Svo þarf ég að drífa mig í að gera eitthvað í myndamálum.....þetta gengur bara ekki lengur

Þvílík orka! Ég er núna búin að fara eftir DDV matarprógramminu í tvær vikur og það sem ég finn mest fyrir það er aukin orka. Ég er vön að fara á fætur klukkan sjö á morgnanna en nú er svo komið að ég er vöknuð fyrr. Þá er það næsta mál á dagskrá það er að fara að hreyfa sig....er að velta því fyrir mér að fara út að skokka eða labba fyrir sjö. Ætla að hugsa þetta aðeins, svona hvernig ég ætla að hafa þetta. Þetta er í lagi núna á meðan það er ekki mjög dimmt á morgnanna en annars verð ég að þræða upplýstar götur. Stóri hringurinn (sem kallaður er hér í þorpinu) er ekki upplýstur en hann er hæfilega langur eða um 4 km.
Svo er vigtun í kvöld....spennandi!!

Er maður orðinn eitthvað ruglaður? Ég hef verið að reikna SKO ef ég miða við fyrstu vigtun þá  hef ég 42 vikur til stefnu (miða við 17. júní 2007) þá erum við að tala um rétt tæp 500 grömm á viku sem ég þarf að léttast! EN ef ég ætla að taka 1 kg. á viku þá erum við að tala um 21 viku og það er í lok janúar!!! pælið í því svona getur maður endalaust leikið sér að tölum!
Var að bæta Lenu í tenglahópinn. Jæja verð að hlaupa upp á kaffistofu í mat.....ég er sko með grænmetissúpu og 2 egg og brauð mmmmm namminamm!

Við fjölskyldan fórum norður í Skagafjörð um helgina. Tókum okkur frí í vinnu frá hádegi á föstudag og brunuðum af stað. Ferðin gekk vel, fórum beint í kaffi til tengdó og auðvitað var hún með svoleiðis kræsingar að borðið svignaði (næstum því sko)...ég fékk mér kaffi og síðan bara eina appelsínu! Ég hefði ekki trúað því að ég gæti þetta, hef ekki fundið fyrir sykurlöngun í eina mínútu. Síðan vildi tengdó að við borðuðum hjá henni og það var allt í lagi en það voru kjötbollur og nóg var til af grænmetis/ávaxtasalati, er samt ekki viss um að hlutfall grænmetis hafi verið nóg en eigum við ekki bara að segja að þetta hafi verið 90% DDV dagur. Í gær fór dagurinn vel af stað, ég mamma og yngri stubburinn minn fórum á Akureyri við fórum frænku minnar og borðuðum þar í hádeginu, skyr brauð og tómatar lágu þar (en örugglega ekki nógu mikið af tómötum). Þegar við vorum komnar heim í sveitina þá fór mamma að gera kvöldmatinn til en það var hangikjöt!!!!! EN það var boðið upp á DDV rauðkál, Bonduelle grænar baunir (ekkert Ora), soðnar rófur, blómkál, belgbaunir, sykurbaunir og baunaspírur....mmmmmm þetta var rosagott en svindl dagsins var uppstúfur og rjómi en í desert voru ferskir ávextir og ber í einhverju rjómagutli en ég fékk mér reyndar mjög lítið af því. Laugardagurinn var semsagt ca 70% og enn og aftur enginn sykur freistaði. Dagurinn í dag er síðan 100% borðuðum morgunmat í sveitinni minni en fórum síðan til tengdó í hádeginu í kjötsúpu, brunuðum síðan heim á leið.
Svona var semsagt helgin okkar! Ný vinnuvika að hefjast og maður farinn að skipuleggja matinn, ætli það verði ekki fiskur í hvert mál eftir allt þetta kjötát, geri svona frekar ráð fyrir því. Síðan er vigtun á þriðjudag, bíð spennt eftir því.

Jæja, þá eru útslitin í Rockstar Supernova afstaðin og maður getur farið að sofa aftur á skikkanlegum tíma! Annars var frábært að sjá hvað honum Magna gekk vel.....og ég er ágætlega sátt við að Lukas skildi vinna hann virðist passa vel inn í hópinn og þetta er bara frábært og Magni er lang lang flottastur.
Gærdagurinn var 100% dagur hjá mér og stefnir í að þessi dagur verði það líka, mér gengur svo vel að fara eftir þessu prógrammi þegar rútínan er í lagi. Er svolítið hrædd við helgina því við ætlum að fara norður í Skagafjörð og líka að kíkja aðeins á Akureyri en norðurferðirnar einkennast af endalausum matarboðum og látum....EN ég ætla að halda mínu striki!

Gleymdi víst að segja frá því að fyrsta vigtun var í gær....og jeij það fuku 1,8 kg!  Nú er eins gott að maður haldi sig við efnið....dararararæ

Jæja loksins lét ég verða af því!! Byrjuð að blogga
Ástæðan er sú að ég byrjaði í DDV fyrir viku síðan. Eins og einhver sagði (las það einhversstaðar) þá er ég líka sérfræðingur í að fitna, hef alveg síðan á unglingsárum verið yfir kjörþyngd en ég veit að ef ég tek ekki í taumana núna þá á þetta bara eftir að versna. Ákvörðun mín að ganga til liðs við DDV er mjög meðvituð en það sem hefur veitt mér óendanlega trú á þessu eru átaksbloggarar en ég hef bókstaflega legið yfir bloggsíðum þeirra og finnst ég bara þekkja þessar hetjuralveg heilmikið! Ég á nokkrar vinkonur sem eru að breyta um lífsstíl eins og ég og ætla ég að gera allt sem ég get til að styðja þær og "peppa" þær upp. 
Ég ætla að setja inn myndir og fleira næstu daga....vonandi!